بوگون بير اؤنملي بير ايدمانچي ايلا تانيش اولدوم. بو ايدمانچي زنگانين فخري ساييلان "واترپلو" ساحه سينده و "اوزمه" رشته سينده چاليشيردي. تهراني بوشلاييب بير استخر يولا سالماق اوچون زنگانا قاييديب دير. بو گله جك ده سالان اسخرينه يئر آختاريردي. اما تاسف اولسون بيزيم بعضي وطنداشلاريميز بوجور اينسانلارين اليندن توتماق يئرينه اونلارين قيچيندان توتوب، ايشلري نين قارشيسيني آليرلار. البته من اؤز يئريمده چاليشيرام اونا يارديم ائدم. بو سؤزون بوردا باشين آچماقدان مقصديم بو مساله دير:
" ياتيريمچي (سرمايه گذار) اينسانلاريميزين الين توتاق؛ اونلارا يارديم ائدك؛ اونلار بيزيم وارليغيميز و ثروتيميزديلر"

دونن ايكي كيتاب اوخودوم بيريسي "سنگي بر گوري" آديندا، بيريسي ده "زني كه مردش را گم كرد."
ايلك كيتابين يازاري "جلال آل احمد" ايكينجي سه ده "صادق هدايت" ايدير. الته ايكينجي سي بير قيسا حيكايه ساييليردي و من اونلارين الكترونيك نسخه سيني اوخودوم. منجه اوخوماغا دَيَرلري واريدي.

بايرام گونلري ياخينلاشير. بو ايلده كي دويغومدا بايرام گليشيني حيس ائتميرم. بيلميرم ندندير!؟ بير غريب حيس بوتون وارليغيمي بورويوب. اينسان ياشا دولاركن بو ايللرين گل گئديشلريني آجي بير شكيلده دويور. ايكي گوندن سونرا آد گونومدور. ياشاديغيم ايللرين ساييني بير دنه داها آرتيرمالييام.آه... كئچير....گئدير....اوزور.....داغيدير..... و من قاليرام اؤز... .

گون لر گليب كئچير؛ هر بير گون كئچركن بيز بير آدديم داها سون نقطه يه ياخينلاشيراق. بو مساله اينساني كدرلنديرير. اوزوجو بير گئرچك دير. تيكراري گونلر؛ بوش يئره قاچاقاچلار؛ بوش يئره عؤمورو سورمك؛ هي... دانيشماغي دا آدامي سيخير. نئيله مك!؟ چاره سيز بير اينسانيق بو يول گئتمه يه مجبور؛ ...

تيراختور تيمي نين آسيا دا ايلك اويونو 3 گوندن سونرا تبريزده كئچيريله جك. بو آذربايجان ايدماني اوچون ان اؤنملي آن لاردان بيري دير. بو گون آذربايجان نين اولوسلار آراسي ياريشمالارينا قاتيلديغيبير گون ساييلير. اومودلويام كي چوخلو تماشاچيميز اولسون. ياشاسين تيراختور-ياشاسين آذربايجان

بو گون دونيا آناديلي گونودور. بيزه بو گون چوخ اؤنملي دير. آنا ديليميزين چوخ چتين ليك لره معروض قالديغيني گؤروب چوخ كدرلنيريك. بو گؤزل قايدا قانونونلو ديل، دويومسال و هر شي دن باشقا بيز تورك لره ثروتيميز اولان ديل ايندي ياخشي دورمو دا دئيل. اما بو مساله لره دم كئچميش ديليميزين قورويوب ساخلايانلاري دا آز دئيل لر. بيزيم ساوادلي يازارلاريميز، شاعير لريميز، ديلچي لريميز ده وار. ياشاسين لار. گئرچكدن ده ميللتيميزين آغير يوكونو داشيانلارديلار. ياشاسين لار.
بو مدرسه مكتب سيز ديل چتين ليك لره باخمادان انكشاف يولونو داوام ائتديرير. بيزيم ديل ياشياجاق ياشاداجاق.

"ارتباطات" دونياسينا هر گون بير يئني شي اوزه چيخيب سرعتله اينسانلارين ياشاييشينين هر بير ساحه سيني بورورويوب، گئنيش شكيلده هر قاعده ني دئيشديرير. نئچه ايل دي بو "توپلومسال شبكه لر" هر نه يي تاثير آلتينا آليب. بونلاري ايچينده ده داها گوجلوسو فيس بوك، تويتر باشدا اولاراق هاميني اؤزونه ساري چكيب.
من بوردا مساله يه اؤز باخيشيمدان توخونماق ايسته ييرم؛ منجه بو سايتلارين اولوملو اؤزلليك لرين دن كنار بير پارا اولومسوز تاثيرلري ده وار؛ بونلارين لاپ باشيندا اولان منفي تاثير  بودور: اينسانلارين بو مجازي سايتلارا دلي جه معتاد اولمالاري دير! هر نه يي بوشلاييب گئجه گوندوزلري نين چوخلو  واخت پاييني بو سايتلاردا صرف ائتمك! سيزجه بئله دئيلمي؟

ياديما گلن آزربايجانيميزين هميشه چتين قيش لاري اولاردي. اما بيلميرم ندن بو ايل قيشدان هئچ خبر چيخمادي. اوشاقليق چاغ لاريميزدا قار ياغاردي نه بويدا! بيلميرم يئره ياغان قارلارين بويو اوجا اولاردي يا دا بيز اوشاقلارين بويو آلچاق! هر نه ايدي اينديكي قيشلاردان داها چوخ قار ياغاردي. ائله بيل تانري بو ايل قيش دويمه سي نين باسماسين اوندوب! اما بير ياندان اورمو گؤلوموزون بو ايل ده سوسوز قالديغينا باخماييب او بيري ياندان زلزله زده وطنداشلاريميزين راحات بير قيش كئچيردييي لرينه گؤره بير آز دا سئوينمه لي ييق.

بيزيم شهر ده ايلك مدرن مكتب (مدرسه سيستمي ايله) 100 ايله ياخين عؤمورو وار. بو مدرسه محمديه آديندا 1295 ده تيكيلدي. اولسون كي اؤز آناديليمزده اولمادي اما بيزيم شهريميزين كولتورلو بير شهر اولدوغونو ثبوت ائدير. بو مدرسه ده آدليم اؤيرتمن لريميز ايشه آليندي: نوعي، هاشمي، انوري و ...
1310 جوارلاريندا دا بلديه ميز اولدو.  بيزيم بلديه ده آذربايجانين ان قديم بلديه لريندن ساييلير. شهرده چوخلو تيكينتي ايشلري آپاريلدي. بازار تيكلدي؛ بؤيوك يوك گاراژي برپا اولدو. كؤرپولر ساليندي و ...ايندي يه قدر ده بونلارين چوخو شهريمزده اقتصاد باخيميندان بؤيوك رول لاري وار. شهريميز سون اربابي (يا خاني) فتحعلي خان افشار آديندا بيريسي ايدير. "ساعد السلطان" آدلانارميش. ايندي ده اونو قالاسي شهريميز ايچينده قالير. بو قالا "سردار قالاسينا" دا مشهوردور....(آردي وار)

دونن يورد سايتين دان 20 دنه دن چوخ آلديغيم كيتاب گليب اليمه  چاتدي. بو سايتي چوخ سئويرم. سسين ائشيديب اما ياخيندان گؤرمه ديگيم سايين علي بي فرهاد جيناب لاري چوخ دوزگون شكيلده بو سايتي دولانديرير. سيز بو سايتا باش وروا بيلرسينيز و منيم بو دئديگيمي سينيابيلرسينيز. الي قولو وار اولسون. ياشاسين...

منيم شهريم آزربايجانيميزين باتي آزربايجان ولايتينده يئرلشير. بو ولايتين لاپ گونئينده بير پارلاق اولدوز كيمي قاش گؤز آتير. نفوسو آزدير . 80-90 مين آراسيندا اولا بيلر. اما بو سايين 4-5 قاتي قدر ده شهريميزدن ديشاري چيخيب غوربت تورپاقلاردا ياشييرلار. بالاجا اولدوغونا باخمايين، چوخلو بؤيوك اينسانلاري بويودوب اما ....
"اما" سيني يئرينده دانيشاجاغام. گؤرمه لي يئرلري وار: هاميسندان آدليم يئري "تخت سليمان" دير. اما چوخو دا وار كي اولا بيلسن تانيميرسينيز: "چملي گؤل"، "ساري قورخان"، "ايستي سو"، "ايوان ساري" و ...
يئر آلتي ثروتيميز چوخدور؛ اما بيزه عائيد اولمور. يئر آلتيندان چيخاركن گؤزدن ايتير. آه! بو باره ده درديميز بالقيز داغيميز بويوندا ديككه ليب....
بالقيز داغي! ان اوجا زيروه ميز بو داغين باشيندادير. بو زيروه يه چيخاركن بؤلگه ميزين چوخلو يئرلري گؤرونور. بو داغ بيزيم "صلابت" سيمگه ميزدير...(آردي وار)

يازيرام، چونكو يازمالييام. ايچيم او قدر دولو دور كي سؤزلر اورييمده سيغينمير. اوركدن كئچن هر ني يازماق ايسته ييرم. منيم وئبلاگيم قونوسوزدور. يازي لاريم دا هاميسي آني دير. بيرباشا بئين دن كئچه ني وئبلاگ صحيفه سينه ك‍ؤچورده جه يم. آني يازي لار...