"صباحي" ايلليك حئكايه اؤدولو(ايكينجي ايل-1393)

SABAHI SHORT STORY AWARD :2014

 

اؤدول: بير ميليون تومن (بيرينجي سيرادا يئرله‌شن حئكايه يا حئكايه‌لر اوچون)

- اثرلرين گؤندرمه مؤهلتي:  31 شهريور 1393

- ياريشمانين سونوجو اعلان ائديلن گون:  1 آذر 1393

- اثرلر آذربايجان توركجه‌سينده و عرب اليفباسيندا يازيلمالي دير.

- هر يازيچي بير اثر گؤندره بيلر.

- اثرلرين ايندي‌يه‌دك باشقا يئرده (كيتاب، درگي، سايت) چاپ اولونماماسي گركلي دير.

- حيكايه لر word دا تايپ اولونوب بو آدرسه گؤندر مه لي دير:  sabahi.odulu@gmail.com

- اثرله بيرليكده اؤزونوزدن بير قيسا بيوگرافي گؤندرين.(شكيلينيز، تيلفون نومره نيز اونوتولماسين)

 

صباحي اؤدولو ياريشماسي نين اجرايي هيئتي

دئيرلر آلمانلي فيلوسوف، شوپئنهاوئر، فرانكفورت شهرينده ياشاديغي زامان، ناهار يئمك‌ اوچون اينگيلسلي‌لر رستورانينيا گئدرميش. ناهاردان اونجه ماساسي اوسته قيزيل بير پول آتارميش سونرا يئمه‌يي توكه‌ديب قيزيل پولونو گؤتوروب رستوراندان چيخارميش. بيرگون رستوراندا اولان ايشچي‌لردن بيريسي شوپئنهاوئرين بو ايشي‌نين سببي‌ني بيلمك ايستر. شوپئنهاوئرين بو ايشچي‌يه وئرن جاواب چوخ ماراقلي‌دير :"بو پولو نذر ائتميشم. هر آن بو اينگيليسلي‌لر، قادين، آت و ايت‌دن كنار، باشقا مساله‌لر باره‌سينده ده قونوشسالارسا، بو قيزيل پولو صدقه وئره‌جه‌يم."

ايندي من بو دوشونورم گؤره‌سن شوپئنهاوئر نذريني يئرينه يئتيره بيلدي يا يوخ؟ يا گؤره‌سن اگر شوپئنهاوئر بيزيم چاغدا اولسايدي دئدييي شئي‌لره نه‌لري علاوه ائدردي؟... ماشين‌مي؟...موبايل‌مي؟...يئرمي؟...

پاييز تزه گلميشدي. داها دوغروسو، هله تزه-تزه اؤز گليشيني ثبوت ائتمك ايسته‌ييرميش كيمي هاوالار سون گون‌لر سويوماغا باشلاييردي. اونيورسيته‌دن چيخيب ياغيشين آلتيندا دئمك اولار كي، قاچا-قاچا اؤزومو مئترويا چاتديرماغا تله‌سيرديم. ياغيش ائله برك ياغيردي كي، باشيمي قالديرماغا، اطرافيما گؤز يئتيرمه‌يه ماجال تاپميرديم. ائودن چيخاركن آنامين «بو گون ياغيش هاواسي وار، اؤزونله چتير گؤتور» مصلحتينه قولاق آسماديغيم اوچون ده پئشمانچيليق كئچيريرديم ايچيمده. آمما اون‌سوزدا استفاده ائتمه‌يه‌جه‌ييمي بيليرديم آخي… يايدا عينك، ياغيشدا چتير استفاده ائتمك هئچ عادتيم دئييل. عينك‌دن استفاده ائتمه‌مه‌ييمين سببي هر شئيي اؤز رنگينده گؤرمك ماراغيم‌دير. گونشي ده، دنيزي ده، آغاجي دا، بير سؤزله هر شئيي اؤز رنگينده گؤرمك ايسته‌ييرم. 

كئچن هفته "كيتاب" آدلي بير كيتاب اوخويوردوم. يازار بو كيتابدا مختلف اؤلكه‌لرين كيتاب اوخوماقلا نه تهر ياناشمالاريني اينجه‌له‌ميشدي. ژاپون، آلمان، توركييه، برزيل، فرانسه، كانادا و ... كيمي اؤلكه‌لرين، كيتاب اوخوماق‌لاري حاقيندا ماراقلي بيلگي‌لر وئرميشدي. هر اؤلكه‌ني ده ايرانين وضعيتي ايله مقايسه ائتميشدي. بو مقايسه‌لرين بعضي‌سينده بيزله اونلارين آراسيندا اولان بؤيوك فرق‌لر گؤرونوردو!!! مثلن ژاپوندا هر كس بير گونده 90 دقيقه كيتاب اوخور و ايراندا بو زامان 2 دقيقه!!! دير. اينگيليسده ده بو زامان 55 دقيقه. 75 ميليون نفر ايراندا بير گونده  جمعي 150 ميليون دقيقه كيتاب اوخور ياني 2.5  ميليون ساعات! و 130 ميليون ژاپونلو بير گونده 11.7 ميليارد دقيقه ياني 195 ميليون ساعات. بيزه گؤره 78 قات داها آرتيق!!! بو رقملره باخيب بيرآز دوشونسك داها ياخشي اولمازمي؟ نه‌دن كيتاب‌لار بيزدن بو قدر اوزاقديلار؟

دان يئري سوكولموشدو. ايشيق ائوين پنجره سيندن ايچه‌ري يه ساچيردي. هر گونه ساياق بوگونده بازارا گئتمه لي ايدي. ائودن چيخيب يوللاندي. هر گون بازارين ايلك دوكاني بونون الي ايله آچيليردي. اونون بالاجا دوكاني راستا بازارين[1] آغزيندا يئرلشميشدي. بير كوهنه دوكان اولاراق، قاپي لاري هله ده تاختادانيدي. راستا بازارين سيرالانميش چيراغ لاري آرا-بير سؤنولموشدو. اوزاقدان سوپورون اوخوما سسي گليردي. بوقچاسيني آچيب گتيردييي پنير چؤركدن يئمه يه باشلادي. بوگون ايشي چوخ دا دئيلدي. 

وئيسل دلي دئييلدي. ساده‌جه، او، يولا چيخماقدان قورخوردو. قورخوردو، يول اونو آپارار. بو قورخو بيردن-بيره يارانماميشدي، سبب‌كاري دا اؤزو دئييلدي. هر شئي ياواش-ياواش جريان ائتميشدي و بوتون اولان‌لار اونون اوشاقليق واختلاريندان باشلاميشدي. اونون ايكي ياشي واريدي، آنجاق هله دانيشا بيلميردي. اونلارين ائولري يول كناريدا يئرلشيردي. آتاسي ائوده اولاندا او، گونونو آتاسي‌نين ديزي ديبينده، ماشينين آچارلاري ايله اويناياراق كئچيريردي. بو اونون خوشونا گليردي. دئمك اولار كي، ان سئودييي مشغولييت ائله بو ايدي. آتاسي ائوه گيرن كيمي، وئيسل اشاره بارماغيني قالديرار، آتاسي دا جيبيندن آچارلاري چيخاريب اونا وئرردي. آمما، بير گون آتاسي ائوه گلمه‌دي. او گوندن سونرا دا وئيسل آتاسيني هئچ گورمه‌دي. آتاسي گئدندن سونرا بوتون گونو آناسي‌نين اته‌ييندن ياپيشاردي. آناسي ايسه وئيسل-‍ه او گون ساده‌جه بير سؤز دئميشدي: «هئچ واخت يولا چيخما، يول سني ده آپارار». همين گون وئيسل-ين و آناسي‌نين گؤزونه يوخو گيرمه‌دي.

اوزون مدتلي بير تعطيلات كئچيرتديك؛ ييديك، ياتديق، دوردوك، يئنه ييديك، ياتديق، دوردوك، يئنه...!! تعطيلاتيميز دا ايش گونلريميزه تاي تكرارلارلا دولو ايدي. هر نه‌يي تكرارلييان بير اينسان اولموشوق...! آنجاق بو بايرامدا گؤردويوم بير ايشيمه سئوينيرم؛ او دا كيتاب اوخوماغيم دير. شيخلي نين "اؤلن دونيام" رومانيني اوخودوم و دويونجا لذت آلديم. آرادا نئچه بير قيسا حكايه‌نين اوخوماغي دا داها دادلانيردي بو بايراميمي!! بير حكايه ده يازيب "ادبي آزادليق اؤدولو"-نه يوللاديم. هر حالدا مني راضي ساخلايان دا ائله بو اوخومالار و يازمالار اولدو؛ ياخشي كي كيتاب وار؛ ياخشي كي اوخوماق وار؛ يازماق وار؛ بونلار وارسا اگر ياشاماق دا وار... ياشاسين اوخوماق، يازماق؛ ياشاسين ياشاماق

داغ‌لاريميزي، داشلاريميزي اؤزله‌ميشم؛ دره‌لري، تپه‌لري، آغاج‌لاري اؤزله‌ميشم؛ من او گؤزل و صاف اورك‌لري، محبت‌له دولو، سئوگي‌له دولو، ميهربانليقلا دولو اؤرك‌لري اؤزله‌ميشم؛ ائويميزه ييغيشيب، ياري گئجه‌يه قدر بؤيوك بابامين ناغيل‌لارييني دينله‌مه‌يي، جاواد عمي‌ميم جاوانليق خاطيره‌لري‌نين بيزه دانيشماسيني اؤزله‌ميشم ! من سينزه گونو قوجور باغينا گئتمه‌يي اؤزله‌ميشم؛ يايدا قئينرجه‌نين ايستي سويونا دوشمه‌يي، قيشدا چمران مدرسه‌سي يولوندا سويوقدان اؤترو او كيچيك ال‌لريمين گؤينمه‌سين اؤزله‌ميشم؛ سونرا او ال‌لري نفت بوخاري‌لارين بؤرونه توتوب داهادا گؤينه‌مه‌نين آرتماسيني! قالا داليندا محله‌ميزين تورپاغلي كوچه‌لريني! محله‌نين قيز-اوغلان‌لاريلا "قوجا بابا هارا گئديرن"، "تئهران خاناسي" اوينامالاريني! خوللوق اويناييب اوتوزوب سونرا، قالاداليندان گالاجارا قدر "اله‌مه‌له زووو.." چكمه‌يي اؤزله‌ميشم؛ آتامدان بير تومن آليب سونرا تپه محله‌سينده كي "مش يوسوپ" دوكانيندان قيفي بستني آلماغي! ميظفر نفتچي، ايكي ائشه‌يي ايله، حلبي پوت‌لاردا نفت گتيرمه‌سيني بئله اؤزله‌ميشم!! "آردا توت ساتان" كيشي‌نين سسيني!  محله‌ميزه گلن "اعلا ايسكان‌لار! اعلا چاي سوزن‌لر" باغيران چرچي‌ني! يايدا "شكر آلما" ساتان‌لاري! "عليرضا دايي" گيلدن صوب چاغي يوخولو گؤزلريمله گئديب اينك سوتو آلماغي! من محله‌ميزده‌كي زاغالاري اؤزله‌ميشم! زاغالارين اوستونده قاچان قاچان اويناماغي! آغاجا مينيب آت چاپديرماغيميزي! قورخا قورخا محله اوشاق‌لاري ايله آشاغي محله‌يه گئديب سؤكولن مولوك حامامي ‌نين سينيق كاشي‌لريندن كلكسيون ييغماغي!!  سويوموز كسيليب محله‌ده كي منبع‌دن سو گتيرمه‌ميزي! تيكان‌تپه‌نين ايچيميزه قدر دوندوران سويوغونو! ائويميزده قورولان كورسونو! (گاز گله‌لي داها او سويوق‌لاري دويماق اولمور) من ...اؤزله‌ميشم....من...

... نه بيليم شهريمين ياخشي‌سيني، بئله پيسيني ده اؤزله‌ميشم!...

نه اولور؟ مني بيريسي او اؤزله‌ديييم گونلره آپارسين! نه اولور...

دونيا آناديلي گونو ياخينلاشير. دونيا تقويمينده "آنا ديلي" آدينا بير اؤزل گونون اولماسي چوخ اؤنملي بير اولاي‌دير. بو گونون يارانماسي 14 ايل بوندان اؤنجه اولوبدور. كئچن آي‌لاردا تازا سئچيليب ايشه اوسته گلن پرئزيدئنت آناديليميزين مكتب‌لرده اؤيره‌نيلمه‌سيندن خبر وئريبدير. سئوينديرينجي و اومود وئريجي بير خبر! گؤره‌سن بو ايش دوغرودان گئرچك‌لشه‌جك‌مي يا يوخ!!؟ آنجاق بو دونيا آناديلي گونونوده بو حاقدا داها چوخ قونوشوب و يازماليييق. هر كس اؤز يئرينده بو حاقدا باشقالارينا بيلگي وئريب و بو مساله‌نين مملكتيميزين نه‌قدر گله‌جه‌يينه اؤنملي اولماسيني آچيقلامالي‌دير. منجه بعض يئرسيز و بوشو بوشونا نيگرانچيليق يارادان‌لارين سؤزلرينه باخمادان بونو اينانماليييق كي "آنا ديل‌لري‌نين مدرسه‌لرده اؤيره‌ديلمه‌سي وطنداش‌لار آراسيندا داها دا بيرلييي گوجلنديره‌جك".

"ماندلا"ني سئومك بو گون‌لر "پرستيژ" ، "كيلاس قويما" كيمي بير شئي اولوب. ماندلانين دوشونجه‌سينه و آپارديغي مبارزه‌لره ذره‌جه اينانمايان بعض اينسان‌لار بو گونلر اؤزلريني "ماندلاچي" كيمي گؤسته‌ريرلر. آمان بو ايكي اوزلو اينسان‌لارين اليندن!!! بو اينسان‌لارا بيرزاد دئمه‌لي‌يم: اگر ادعانيز وارسا ماندلادان بير آز "صبر"، "باغيشلاما"، "باشقا اينسانلارا حتي سيزينله عقيده‌ده مخالف اولانلارا حؤرمت ائتمه‌ني" اؤيره‌نين. بو قدر "آسارام-كسرم-داغيدارام-ووررام-اؤلدوررم" سالمايين. ساواشا يوخ باريشا اينانين

نه‌قدر خاطيرلاييرسينيز بيلميرم آنجاق بير زامان‌لار تيليويزيون‌دا چوخ ماراقلي طنزه ياخين "آينه عبرت" آديندا بير سئرييال واريدي. بَشكه‌ده طنز دئييل‌دير آمما بيز اوشاق ايكن بو سئرييالا طنز گؤزو ايله باخارديق؛ سببي ده "آقا تقي" آدلي بير شخصييتين رول اويناديغينا گؤره ايدي. هر حالدا بيزيم بو آقا تقي مخدره بولاشان بيريسي ايدي! ياني: معتاد ايدي! او زامان‌لار معتاد زادي ياخيندان گؤرمزديك؛ تكجه تيليويزيون‌دا گؤزوموزه ساتاشاردي. او زامانكي چوخ كيف آلديغيميز بو باخيملي سئرييال‌دان آقا تقي‌لر واتوو-واتوو (قديم بير چيزگي فيلمين آدي) كيمين چوخاليب؛ سونرا تيليويزيون‌دان ائشيگه چيخيب و گئرچك دونياميزا گيرديلر. او طنز تيليويزيون‌دان چيخيب گليب دوز شهريمزه آجي بير طنز جانلانديرير ايندي! چوخ سئوديييم دوست‌لار، تانيش‌لار يا دا تانيمياديغيم جاوان‌لار ايندي چؤنوب بير آقا تقي اولوبلار! اعتيياد اينسانلاريمزي يانديرير، ياشاييشيميزي يانديرير، شهريميزي كوله چئويرير؛ ائويميزده يووا سالان دوشمن بيزي ايچيميزدن چوروتمه‌يه قصد ائديبدير...

غمدن كدردن يازماني سئومرم آمما هردن اينسانين ايچينده اولان آجي‌لار جوشوب ائشييه چيخماق ايسته‌يير. دؤرد بئش گون تيكان‌تپه‌ده ايديم. وطن هاواسيندان نفس آليرديم؛ ياني گؤزل آن‌لار ياشاتيرديم اؤزومه! آنجاق سون گونده آجي بير خبر آلديم. دوست‌لارين بيريسي‌نين باجيسي گنج چاغيندا دونياسيني دييشدي! بو قدر ساده ياني! گئتدي! ايكي اوشاغين آناسي! بير عائيله‌نين قيزي! اؤلوم سببي: "سرطان".
سرطان باره‌سينده نه‌قدر بيلگي‌ميز وار؟ بو قاتيل نه‌دن بيزلردن ال چكمير؟ هر گون سرطانا مبتلا اولان‎لاريمز چوخالير. سرطان عائيله‌لري داغيدير. منجه سرطان باره‌سينده شهريميزده بير ايش‌لر گؤرمه‌لي‌ييك.

بو ايل جمهور باشقاني سئچكي‌لرينده بعض آداي‌لار بير سيرا سؤزلر وئرديلر. بيزيم ديليميزه گؤره ان اؤنملي‌سي روحاني‌نين تبريزده "تاسيس فرهنگستان زبان آذري" عنوانيندا وئرديگي وعده ايدي. روحاني سئچكي‌لرده قازاندي و بيزيم آذربايجانداندا چوخ سس‌لر ييغيشديردي. هر حالدا 4-5 آي ايشين اوستونه كئچندن سونرا هله‌ده بو وئرديگي وعده اوغروندا هئچ بير شئي گؤرمه‌ميشيك. دئيرلر روحاني هله‌ليك خارجي سياست‌لري ساهمانلاماغا مشغول‌دور. اوردان قورتولسا گليب بو ايشلره‌ده باخاجاق!! الله اعلم! ائله‌بيل هله دؤزمه‌لي‌ييك!!!

اورمو گؤلو قورويوب محو اولماق حاليندادير. ايكي هفته اؤنجه اورمو-تبريز آراسيني گئركن گؤلون سون دورمونو ياخيندان گؤردوم. گؤزلريم دولدو. اوشاغي ايكن ياديميدادير تيكان‌تپه‌دن اورمويا گئدنده گؤلون دالغالاري سويو گتيريب جادانين ايچينه سپه‌لردي. هئچ اينانمالي دئيل بو دوروم! اورمو آديندا بير گؤل داها گئرچك دونياميزدان كؤچمك حاليندا گئديب تكجه كيتاب‌لاردا، شكيل‌لرده بير خاطيره كيمي قالاجاق. گؤلو بيز اينسان‌لار قوروددوق. من، سيز، هاميميز! بيز طبيعتله سايغي‌لي داورانماديق. تانري‌نين بيزه باغيشلاديغي بو گؤزل، فايدالي گؤلون قدريني بيلمه‌ديك. بيز اورمو گؤلونو اؤلدوردوك. بيز طبيعته خيانت ائتديك. ايندي طبيعتين عصياني‌ني اؤزوموزه قارشي گؤزله‌مه‌لي‌ييك. دوغا انتقاميني بيز اينسان‌لاردان آلاجاق. كسين‌ليكله آلاجاق... بو قدر وئجسيز-اعتناسيز دوروب بو گؤلون سون نفس‌لريني ايزله‌مك كسين‌ليكله آغير بير جزاسي واريدير بيزلره. بو جزاني گله‌جكده اؤده‌مه‌لي اولاجاييق...

ترجومه ادبيياتي هر بير ادبييات ايچه‌ري‌سينده اؤنملي بير بؤلوم ساييلير هابئله بيزيم ادبيياتدا. ترجومه اولونان هر بير اثر بيزيم ادبييات خزينه‌ميزه آرتيريلان بير اثر كيمي دير. فارس ادبيياتيندا گوجلو بير يازيچيليق مهارتينه ماليك اولان غلامحسين ساعدي دن ايكي اثر بيزيم ديليميزه ترجومه اولونوب. بو اثرلري خانيم نيگار خياوي كئچن ايل‌لرده چئويريبدير. "بيل عزاليلاري" و "توپ" روماني‌ني اؤز ديليميزده ده اوخويوب و اوندان لذت آلماغي حؤرمتلي شاعيريميز و مترجيمي‌ميزه بورجولويام. دوغرودان دا "شاه اثرلري" اؤز ديليميزده اوخوماغين باشقا بير دادي وار...