دونيا آناديلي گونو ياخينلاشير. دونيا تقويمينده "آنا ديلي" آدينا بير اؤزل گونون اولماسي چوخ اؤنملي بير اولاي‌دير. بو گونون يارانماسي 14 ايل بوندان اؤنجه اولوبدور. كئچن آي‌لاردا تازا سئچيليب ايشه اوسته گلن پرئزيدئنت آناديليميزين مكتب‌لرده اؤيره‌نيلمه‌سيندن خبر وئريبدير. سئوينديرينجي و اومود وئريجي بير خبر! گؤره‌سن بو ايش دوغرودان گئرچك‌لشه‌جك‌مي يا يوخ!!؟ آنجاق بو دونيا آناديلي گونونوده بو حاقدا داها چوخ قونوشوب و يازماليييق. هر كس اؤز يئرينده بو حاقدا باشقالارينا بيلگي وئريب و بو مساله‌نين مملكتيميزين نه‌قدر گله‌جه‌يينه اؤنملي اولماسيني آچيقلامالي‌دير. منجه بعض يئرسيز و بوشو بوشونا نيگرانچيليق يارادان‌لارين سؤزلرينه باخمادان بونو اينانماليييق كي "آنا ديل‌لري‌نين مدرسه‌لرده اؤيره‌ديلمه‌سي وطنداش‌لار آراسيندا داها دا بيرلييي گوجلنديره‌جك".

"ماندلا"ني سئومك بو گون‌لر "پرستيژ" ، "كيلاس قويما" كيمي بير شئي اولوب. ماندلانين دوشونجه‌سينه و آپارديغي مبارزه‌لره ذره‌جه اينانمايان بعض اينسان‌لار بو گونلر اؤزلريني "ماندلاچي" كيمي گؤسته‌ريرلر. آمان بو ايكي اوزلو اينسان‌لارين اليندن!!! بو اينسان‌لارا بيرزاد دئمه‌لي‌يم: اگر ادعانيز وارسا ماندلادان بير آز "صبر"، "باغيشلاما"، "باشقا اينسانلارا حتي سيزينله عقيده‌ده مخالف اولانلارا حؤرمت ائتمه‌ني" اؤيره‌نين. بو قدر "آسارام-كسرم-داغيدارام-ووررام-اؤلدوررم" سالمايين. ساواشا يوخ باريشا اينانين

نه‌قدر خاطيرلاييرسينيز بيلميرم آنجاق بير زامان‌لار تيليويزيون‌دا چوخ ماراقلي طنزه ياخين "آينه عبرت" آديندا بير سئرييال واريدي. بَشكه‌ده طنز دئييل‌دير آمما بيز اوشاق ايكن بو سئرييالا طنز گؤزو ايله باخارديق؛ سببي ده "آقا تقي" آدلي بير شخصييتين رول اويناديغينا گؤره ايدي. هر حالدا بيزيم بو آقا تقي مخدره بولاشان بيريسي ايدي! ياني: معتاد ايدي! او زامان‌لار معتاد زادي ياخيندان گؤرمزديك؛ تكجه تيليويزيون‌دا گؤزوموزه ساتاشاردي. او زامانكي چوخ كيف آلديغيميز بو باخيملي سئرييال‌دان آقا تقي‌لر واتوو-واتوو (قديم بير چيزگي فيلمين آدي) كيمين چوخاليب؛ سونرا تيليويزيون‌دان ائشيگه چيخيب و گئرچك دونياميزا گيرديلر. او طنز تيليويزيون‌دان چيخيب گليب دوز شهريمزه آجي بير طنز جانلانديرير ايندي! چوخ سئوديييم دوست‌لار، تانيش‌لار يا دا تانيمياديغيم جاوان‌لار ايندي چؤنوب بير آقا تقي اولوبلار! اعتيياد اينسانلاريمزي يانديرير، ياشاييشيميزي يانديرير، شهريميزي كوله چئويرير؛ ائويميزده يووا سالان دوشمن بيزي ايچيميزدن چوروتمه‌يه قصد ائديبدير...

غمدن كدردن يازماني سئومرم آمما هردن اينسانين ايچينده اولان آجي‌لار جوشوب ائشييه چيخماق ايسته‌يير. دؤرد بئش گون تيكان‌تپه‌ده ايديم. وطن هاواسيندان نفس آليرديم؛ ياني گؤزل آن‌لار ياشاتيرديم اؤزومه! آنجاق سون گونده آجي بير خبر آلديم. دوست‌لارين بيريسي‌نين باجيسي گنج چاغيندا دونياسيني دييشدي! بو قدر ساده ياني! گئتدي! ايكي اوشاغين آناسي! بير عائيله‌نين قيزي! اؤلوم سببي: "سرطان".
سرطان باره‌سينده نه‌قدر بيلگي‌ميز وار؟ بو قاتيل نه‌دن بيزلردن ال چكمير؟ هر گون سرطانا مبتلا اولان‎لاريمز چوخالير. سرطان عائيله‌لري داغيدير. منجه سرطان باره‌سينده شهريميزده بير ايش‌لر گؤرمه‌لي‌ييك.