بيزيم شهرده و اطرافيدا چوخلو ثيروت‌لر داغ داش آلتيندا ياتيبدير. هرنه دئسَز وار: قيزيل، جيوه، آهن، قيمتلي داش‌لار و .... آمما اونلار بيزيم دئيل. بيز تكجه بو ثيروتين اوستونده ياتماغي باشاريريق!! اؤزگه‌لر گليب اونلاري يئر آلتيندان چيخارديب آپاريرلار. شرمنده‌ليك چكيرم بو دورومدان!! بو معدن‌لر بوشالير و بيزه قالان تكجه دليك دئشيك اولوموش داغلاريميزدير. دوغال منظره‌لريميز،جادالاريميز خارابلانير و باشقالاري وارلانير. بودور منيم تيكان‌تپه‌مين اينديكي دورومو...

دؤرد آي اونجه "صباحي" آدينا بير حئكايه ياريشماسي‌ني پلانلاديق. بو ياريشمانين بيلديريشي اينترنت اوزره ياييلدي. اليميزدن گلن دوست‌لارا، يازارلارا خبري‌ني چاتديرديق. بوگون بو ياريشمايا اثر گؤندرمه‌نين سون مؤهلتي دير. گؤزله‌دييم قدر حئكايه گلمدي. بلكه چاتيشمازليق مندن اولدو. نه بيليم بئشكه ده دؤرد آي آز فورصتي ايدي!! بئشكه ده بو تنبل‌ليك بيزي بوشلايان دئيل!!! بئشكه حئكايه سئوريميز آزدير! بئشكه بير سيرا يازارلار ياريشمالارا قاتيلماغي سئوميرلر. بئشكه ده تحكييه ادبياتيميزين گوجو ائله بو قدر ايميش. بئشكه بير سيرا دوست‌لار بيزيم ياريشمايا سئچديييميز داورلره گؤره قاتيلماديلار. بئشكه ده ...! هر حالدا بو بئشكه‌لرين هاميسي سبب اولابيلر. سيزجه سبب‌لر نه اولا بيلر؟

ايكي گون اؤنجه زنگاندا "گنج اوزان لار بايرامي" كئچيريلدي. 6 گنج آشيغيميز بوردا چيخيش ائتديلر. گؤزل موسيقي لر و اوخومالار سسلندي. منيم ماراقلانديران مساله بو آشيق لارين گنج اولمالاري و  آشيق موسيقي سي نين گله جك دورومونون آيدين اولماسي ايدير. آشيق لار بيزيم موسيقي ده، فولكولوردا و شيفاهي ادبياتيميزدا اؤنملي يئرلري وار. بو صنعت خالقين صنعتي دير و ايللر بويو بيزيم كولتوروموزو قورويان بير صنعت دير. منجه بوگون بيزده بو صنعتي قورومالي و آشيق لاريميزدان حمايت ائتمه لي ييك. حمايت لريميز بو آشيق لاردان مختليف شكيل لرده اولا بيلر؛ مراسيم لريميزه بو آشيق لاري دعوت ائديب بونلارين هنرلريندن فايدالانماليييق. بيزيم بو حمايت لر بو صنعتي قورويوب داها دا گئنيشلنديره جك.

ال آپاريرسان يازاسان، بئينينده كي سؤزلر هاميسي غم كدر اولور. هر نه دن يازماق ايسته ييرم سونوندا گؤرورم يازديغلاريم بير دردلشمه كيمي بيرزاد اولاجاق. بيلميريم من دردي غمي سئون اينسان اولموشام يا دا غم كدرلر اطرافيمدا چوخاليب مني، او بيري اينسانلار ايله بيرليكده دنيز كيمي قوينونا آليب داشييير. آخي هر كسي ايله ده دانيشيرام غملي دي، اومودسوزدور. بو ياني نه؟ ياشاماق چتين لشير يوخسا بيز ياشاماغي چتين لشديريرك!؟؟  سئورديم اؤز آناديليمده طنزدن زاددان يازا بيلم. اما ائله بيل اولمور. آخي آناديليم غملي كدرلي اولدوغو حالدا نئجه او ديلده گولونج شئي لر يازا بيلرم!!؟

بعضن بو ياشاييشين سيخيب بوغماسينا دوشنده آدام خارق العاده گوج لره صاحب اولماق ايستير. هر كس بير شي ايستير و رؤيالاريندا بير شي لري آرزو ائدير. منده... منده كوراوغلونون قير آتين ايسترم. آه!... نه اولاردي كوراوغلونون قير آتي منده اولايدي!!؟ نه اولاردي قير آتا مينيب دره تپه لري دوز ائده ايديم. قير آتيم اولسايدي يقين بير سيرا دلي لريم ده اولاجايدي. ساغ سولومدا منله آت چاپديراجايديلار. هردن ياتيب يوخومدا قير آتين بئلينده چاپا چاپا گؤرمه ديييم يئرلره گئديرم. گئرچك دونيادا گؤره بيلمه دييم ايشلري آشيرديرام. آرزودور دا.... نه اولار. قويون خوش اولوم...

بير اؤيكو ياريشماسي يولا سالديق:"صباحي اؤيكو ياريشماسي". بيلميرم نه قدر باشاريلي اولاجاقدير!؟ اما اينانيرام آذربايجانيميزين ادبياتي و فرهنگي اوغروندا هر آتديغيميز آدديم اؤنملي دير. بو ياريشمايا اؤزل بير وئبلاقدا يولا سالديق. دوستلاريميز بو وئبلاقا باش چكيب نظرلريني پايلاشيرلار. چوخ قونوشولان مساله ده ژوري هيئتي دير. بعض دوستلارين نظرلرينه گؤره بو هيئتين اويه لري ايندي دن بئللي اولمالي دير اما بعض دوستلار دا اونلاري ياريشمانين سونوندا تانيتديرماغي مصلحت گؤرورلر. هر حالدا بيز 15 نفرليك يازارلاريميزلا مصلحت له شيب و اونلار ايچيندن دؤرد يا بئش نفرين راضيليق آليب ژوري هيئتيميزين اويه لرين سئچديك. مصلحت گؤرونسه اونلاري ياخين گله جكده تانيتديراجاييق.

قاچيراق. هؤوله سك بو ياندان او يانا. گون‌لري سايا سايا عؤمروموزدن سيليريك. آنلام‌لار ايتيب. ياشاييشين يول‌لاري بوروق‌لارا دوشوب.هر دن خياوانا چيخاندا اينسانلارا باخيرام. هاميسي دالغين، هاميسي آماج سيز. بيلميرم بيزيم توپلوم بئله دير يا باشقا توپلوم‌لار دا بيزه بنزر گون‌لر كئچيردير. اينسانلاريميزين ياشاييشين پارادان، ائو دن، ماشين دان، موبايل دان عيبارت اولوب. هامي  اؤز يان يؤوره سينده بير يووارلاق يولدا  آوارا اولوب گزير. هر نه يي دئيشمه. ماشين دئيشمه، ائو دئيشمه، موبايل دئيشمه؛ يئنه بير داها ماشين دئيشمه، ائو دئيشمه، موبايل دئيشمه و يئنه ... و بؤيله سينه داوام ائدير بيزيم ياشاييش. هر دن دايانيب بير دوشونمه ليييك؛ هر دن...

بو كيتابين ياييم تاريخي 1387 اولسادا، من اونو تازا اوخودوم. "رضا كاظمي" دن گؤزل و گوجلو بير اؤيكو توپلوسودور. "اختر" نشري ياييبدير. كيتاب 10 اؤيكو دن عيبارت دير. منيم ان سئوديگيم اويكو بو كيتابدا "اوچ گؤرونتو بير قارا باسما" اؤيكوسودور. منجه تامام اؤيكولري گوجلو، تاثير ائديجي و اوخومالي دير.(او جومله دن:"لاپ او اوزاق لاردا"، هؤرولموش خاطيره لر، من و آتام"،" او ايت بيزه باخيردي" و ...) بو كيتابن اوخوماغين سيز دوستلارادا اؤنري ائديرم. آرخائين اولون اوخوماغينا دَيَر.

كيتابين اينگيلسجه ده آدي "Cat in the rain" دير. آدليم يازار "ارنست همينگوي" دن دير. بو كيتابين آذربايجان توركجه سينه چئويرني "شير محمد قدرت اوغلو" دور. سايين "محمد صبحدل" جينابلاري دا كؤچورمه و حاضيرلاما ايشلريني گؤروب و بوتا يايين ائوي طرفيندن ياييليب دير.بو كيتابدا همينگوي دن دؤردحكايه وار: فرنسيس ماكومبئرين قيسا خوشبخت حياتي-هندو قصبه سي- قاتيل لر-ياغيش آلتيندا پيشيك.
همينگوي دن ان آدليم اثر "قوجا و دنيز" پووئستي دير كي اونا نوبئل موكافاتيني قازانديردي.

زنگان شهرينده نئچه اؤنملي كيتاب ساتيش ائوي وار. بونلارين هاميسندان داها گوجلوسو "فرهنگ" كيتاب ساتيش ائوي دير. بو كيتاب ساتيش ائوي نين دونيا و ايران ادبياتي حاقيندا چوخلو كيتاب لاري وار. تازاليقدا "فرهنگ" مغازه سيني داها بؤيودوب و دئمك اولار اؤنجه كي دورومونا گؤره اوچ قات گئنيش له شيب. ائله بونا گؤره ده كيتاب بؤلوم لريني داها خيردالاييب و چئشيتلي بؤلوم لر آرتديريب. ادبيات بؤلومونو ايران، روس، آمريكاي جنوبي، اينگيليس، فرانسا و ... داها بؤلوم لره خيرداليييب. اما تاسف له آذربايجان ادبياتينين يئري چوخ بوش گؤرون و بو كيتاب ساتيش ائوينده ادبياتيمزا بير اؤزل يئر آيريلميييب. زنگاندا بير توركجه كيتابلار ساتان يئريميز ده وار؛ اودا "حكيم هيدجي" كيتاب ساتيش ائوي دير كه بير كؤهنه پاساژين لاپ گؤزدن ايراق قاتيندا يئرله شيب. باشقا كيتاب ساتيش ائولرينده ده توركجه كيتاب لارين سايي چوخ چوخ آزدير. منجه توركجه كيتاب لارين ساتيش دورومو آذربايجانين زنگان بويوندا بير شهرينه اويغون دئيل.

بير گوجلو كيتاب داها. بو كيتابين ساهمانلاياني سايين "آيدن سرداري نيا" جنابلاري دير. بو كيتابدا نئچه قيسا حيكايه (اؤيكو) آدليم يازارلاردان گتيريلمشدير: هاروكي موراكامي، ائرنست هئمينگوي، جان آپدايك، جيميز جويس، آلبر كامو و ... باشقالاري. اؤيكولر هاميسي آنا ديللردن چئويرلمشدير؛ فرانسيزجادان و اينگيلسجه دن. بؤيله كيتاب لارين چوخالماسي بيزيم اديباتيميزا ان واجب مساله لردن دير. بيزه چئويرمه ايشلر داها چوخ اؤنملي دير. آدليم يازارلارين مشهور يازي لاريني اؤز ديليمزده اوخوماق بيزيم ديليميزي داها گوجلنديره جك. آيدين سرداري نيا دان، اولكر اوجقاردان و داها باشقا وارليغيميزين، ديليميزين يولوندا دَيَرلي چاليشانلاريميزدان تازا ايشلريني گؤزله ييريك. ياشاسينلار.

"تاپيلماق اوچون ايتمك": بو سون اوخودوغوم كيتابين آدي دير. بايرام دان اونجه بو كيتابي زنگاندا "فرهنگ" كيتاب ساتيش ائويندن آلديم. يازاري سايين "حامد احمدي" جنابلاري دي. گؤزل و آخيجي بير نثري وار. حامد احمدي دن بوندان اؤنجه نئچه دنه قيسا حيكايه اوخوموشدوم؛ سهو ائتمه سم بيرليك درگي سينده و "آفتاب آذربايجان" درگي سينده. بو كيتاب بير يولچولوق خاطيره سي( سفرنامه) ساييلير. بير ضيالي اينسانين مكه يه گئتمه خاطيره لري و بو حاقدا دوشونجه لري ايله دويغولاري. منجه چوخ گوجلو و تاثير ائديجي بير كيتاب دير. هردن ده جلال آل احمدين "خسي در ميقات" كيتابينداكي بعضي شي لره توخونولور. بير دفه داها اولاراق حيكايه و شعر دن باشقا آيري بير توركجه متن اوخودوغوما گؤره چوخ سئوينديم.

بيزيم تيكان تپه چوخ قوناق سئور بير يئردير. بو ايل بايرامدا چوخلو قوناقلاريميز واريدي. ان گؤرمه يئريميز و داها دوغروسو قوناقلي يئريميز هر زامانا تاي تخت سليمان ايدير. "تخت سليمان" يونسكودا بير دونيا اثري كيمي تانيلميش و ثبت اولونموشدور. بو اثر شهريمزدن 35 كيلومتر آراسي وار. تبريز دن يا دا اورمودن گلن لر گئرك قوشاچايا گليب اوردان سائين قالادان سووشوب سونرا تخت سليمانا چاتسينلار. تهران دان گلن لر زنگاندان سووشوب سونرا بيجار سونرا تيكان تپه ني گئچيب تخته يئتيشسين لر. تخت سليمانين يانيندا داها گؤرمه لي يئرلر ده وار: "دئو زينداني (بير ايچي بوش و گؤرمه لي داغين آدي دير و ماننا لار دؤره سيندن اثرلري وار)- دوغال ايستي سو و ...

يئني ايل باشلادي، او بيري ايل لره تاي. اولا بيلسين كي او بري ايللردن فرقلي اولسون. بو يئني ايلده وطنيمه، ميللتيمه، دوستلاريما، ائليمه، اؤزومه ياخشي بير گله جك آرزولاييرام