دئيرلر آلمانلي فيلوسوف، شوپئنهاوئر، فرانكفورت شهرينده ياشاديغي زامان، ناهار يئمك‌ اوچون اينگيلسلي‌لر رستورانينيا گئدرميش. ناهاردان اونجه ماساسي اوسته قيزيل بير پول آتارميش سونرا يئمه‌يي توكه‌ديب قيزيل پولونو گؤتوروب رستوراندان چيخارميش. بيرگون رستوراندا اولان ايشچي‌لردن بيريسي شوپئنهاوئرين بو ايشي‌نين سببي‌ني بيلمك ايستر. شوپئنهاوئرين بو ايشچي‌يه وئرن جاواب چوخ ماراقلي‌دير :"بو پولو نذر ائتميشم. هر آن بو اينگيليسلي‌لر، قادين، آت و ايت‌دن كنار، باشقا مساله‌لر باره‌سينده ده قونوشسالارسا، بو قيزيل پولو صدقه وئره‌جه‌يم."

ايندي من بو دوشونورم گؤره‌سن شوپئنهاوئر نذريني يئرينه يئتيره بيلدي يا يوخ؟ يا گؤره‌سن اگر شوپئنهاوئر بيزيم چاغدا اولسايدي دئدييي شئي‌لره نه‌لري علاوه ائدردي؟... ماشين‌مي؟...موبايل‌مي؟...يئرمي؟...

كئچن هفته "كيتاب" آدلي بير كيتاب اوخويوردوم. يازار بو كيتابدا مختلف اؤلكه‌لرين كيتاب اوخوماقلا نه تهر ياناشمالاريني اينجه‌له‌ميشدي. ژاپون، آلمان، توركييه، برزيل، فرانسه، كانادا و ... كيمي اؤلكه‌لرين، كيتاب اوخوماق‌لاري حاقيندا ماراقلي بيلگي‌لر وئرميشدي. هر اؤلكه‌ني ده ايرانين وضعيتي ايله مقايسه ائتميشدي. بو مقايسه‌لرين بعضي‌سينده بيزله اونلارين آراسيندا اولان بؤيوك فرق‌لر گؤرونوردو!!! مثلن ژاپوندا هر كس بير گونده 90 دقيقه كيتاب اوخور و ايراندا بو زامان 2 دقيقه!!! دير. اينگيليسده ده بو زامان 55 دقيقه. 75 ميليون نفر ايراندا بير گونده  جمعي 150 ميليون دقيقه كيتاب اوخور ياني 2.5  ميليون ساعات! و 130 ميليون ژاپونلو بير گونده 11.7 ميليارد دقيقه ياني 195 ميليون ساعات. بيزه گؤره 78 قات داها آرتيق!!! بو رقملره باخيب بيرآز دوشونسك داها ياخشي اولمازمي؟ نه‌دن كيتاب‌لار بيزدن بو قدر اوزاقديلار؟

اوزون مدتلي بير تعطيلات كئچيرتديك؛ ييديك، ياتديق، دوردوك، يئنه ييديك، ياتديق، دوردوك، يئنه...!! تعطيلاتيميز دا ايش گونلريميزه تاي تكرارلارلا دولو ايدي. هر نه‌يي تكرارلييان بير اينسان اولموشوق...! آنجاق بو بايرامدا گؤردويوم بير ايشيمه سئوينيرم؛ او دا كيتاب اوخوماغيم دير. شيخلي نين "اؤلن دونيام" رومانيني اوخودوم و دويونجا لذت آلديم. آرادا نئچه بير قيسا حكايه‌نين اوخوماغي دا داها دادلانيردي بو بايراميمي!! بير حكايه ده يازيب "ادبي آزادليق اؤدولو"-نه يوللاديم. هر حالدا مني راضي ساخلايان دا ائله بو اوخومالار و يازمالار اولدو؛ ياخشي كي كيتاب وار؛ ياخشي كي اوخوماق وار؛ يازماق وار؛ بونلار وارسا اگر ياشاماق دا وار... ياشاسين اوخوماق، يازماق؛ ياشاسين ياشاماق

"ماندلا"ني سئومك بو گون‌لر "پرستيژ" ، "كيلاس قويما" كيمي بير شئي اولوب. ماندلانين دوشونجه‌سينه و آپارديغي مبارزه‌لره ذره‌جه اينانمايان بعض اينسان‌لار بو گونلر اؤزلريني "ماندلاچي" كيمي گؤسته‌ريرلر. آمان بو ايكي اوزلو اينسان‌لارين اليندن!!! بو اينسان‌لارا بيرزاد دئمه‌لي‌يم: اگر ادعانيز وارسا ماندلادان بير آز "صبر"، "باغيشلاما"، "باشقا اينسانلارا حتي سيزينله عقيده‌ده مخالف اولانلارا حؤرمت ائتمه‌ني" اؤيره‌نين. بو قدر "آسارام-كسرم-داغيدارام-ووررام-اؤلدوررم" سالمايين. ساواشا يوخ باريشا اينانين

بعضن بو ياشاييشين سيخيب بوغماسينا دوشنده آدام خارق العاده گوج لره صاحب اولماق ايستير. هر كس بير شي ايستير و رؤيالاريندا بير شي لري آرزو ائدير. منده... منده كوراوغلونون قير آتين ايسترم. آه!... نه اولاردي كوراوغلونون قير آتي منده اولايدي!!؟ نه اولاردي قير آتا مينيب دره تپه لري دوز ائده ايديم. قير آتيم اولسايدي يقين بير سيرا دلي لريم ده اولاجايدي. ساغ سولومدا منله آت چاپديراجايديلار. هردن ياتيب يوخومدا قير آتين بئلينده چاپا چاپا گؤرمه ديييم يئرلره گئديرم. گئرچك دونيادا گؤره بيلمه دييم ايشلري آشيرديرام. آرزودور دا.... نه اولار. قويون خوش اولوم...

قاچيراق. هؤوله سك بو ياندان او يانا. گون‌لري سايا سايا عؤمروموزدن سيليريك. آنلام‌لار ايتيب. ياشاييشين يول‌لاري بوروق‌لارا دوشوب.هر دن خياوانا چيخاندا اينسانلارا باخيرام. هاميسي دالغين، هاميسي آماج سيز. بيلميرم بيزيم توپلوم بئله دير يا باشقا توپلوم‌لار دا بيزه بنزر گون‌لر كئچيردير. اينسانلاريميزين ياشاييشين پارادان، ائو دن، ماشين دان، موبايل دان عيبارت اولوب. هامي  اؤز يان يؤوره سينده بير يووارلاق يولدا  آوارا اولوب گزير. هر نه يي دئيشمه. ماشين دئيشمه، ائو دئيشمه، موبايل دئيشمه؛ يئنه بير داها ماشين دئيشمه، ائو دئيشمه، موبايل دئيشمه و يئنه ... و بؤيله سينه داوام ائدير بيزيم ياشاييش. هر دن دايانيب بير دوشونمه ليييك؛ هر دن...

بوگون بير اؤنملي بير ايدمانچي ايلا تانيش اولدوم. بو ايدمانچي زنگانين فخري ساييلان "واترپلو" ساحه سينده و "اوزمه" رشته سينده چاليشيردي. تهراني بوشلاييب بير استخر يولا سالماق اوچون زنگانا قاييديب دير. بو گله جك ده سالان اسخرينه يئر آختاريردي. اما تاسف اولسون بيزيم بعضي وطنداشلاريميز بوجور اينسانلارين اليندن توتماق يئرينه اونلارين قيچيندان توتوب، ايشلري نين قارشيسيني آليرلار. البته من اؤز يئريمده چاليشيرام اونا يارديم ائدم. بو سؤزون بوردا باشين آچماقدان مقصديم بو مساله دير:
" ياتيريمچي (سرمايه گذار) اينسانلاريميزين الين توتاق؛ اونلارا يارديم ائدك؛ اونلار بيزيم وارليغيميز و ثروتيميزديلر"

دونن ايكي كيتاب اوخودوم بيريسي "سنگي بر گوري" آديندا، بيريسي ده "زني كه مردش را گم كرد."
ايلك كيتابين يازاري "جلال آل احمد" ايكينجي سه ده "صادق هدايت" ايدير. الته ايكينجي سي بير قيسا حيكايه ساييليردي و من اونلارين الكترونيك نسخه سيني اوخودوم. منجه اوخوماغا دَيَرلري واريدي.

بايرام گونلري ياخينلاشير. بو ايلده كي دويغومدا بايرام گليشيني حيس ائتميرم. بيلميرم ندندير!؟ بير غريب حيس بوتون وارليغيمي بورويوب. اينسان ياشا دولاركن بو ايللرين گل گئديشلريني آجي بير شكيلده دويور. ايكي گوندن سونرا آد گونومدور. ياشاديغيم ايللرين ساييني بير دنه داها آرتيرمالييام.آه... كئچير....گئدير....اوزور.....داغيدير..... و من قاليرام اؤز... .

گون لر گليب كئچير؛ هر بير گون كئچركن بيز بير آدديم داها سون نقطه يه ياخينلاشيراق. بو مساله اينساني كدرلنديرير. اوزوجو بير گئرچك دير. تيكراري گونلر؛ بوش يئره قاچاقاچلار؛ بوش يئره عؤمورو سورمك؛ هي... دانيشماغي دا آدامي سيخير. نئيله مك!؟ چاره سيز بير اينسانيق بو يول گئتمه يه مجبور؛ ...

تيراختور تيمي نين آسيا دا ايلك اويونو 3 گوندن سونرا تبريزده كئچيريله جك. بو آذربايجان ايدماني اوچون ان اؤنملي آن لاردان بيري دير. بو گون آذربايجان نين اولوسلار آراسي ياريشمالارينا قاتيلديغيبير گون ساييلير. اومودلويام كي چوخلو تماشاچيميز اولسون. ياشاسين تيراختور-ياشاسين آذربايجان

"ارتباطات" دونياسينا هر گون بير يئني شي اوزه چيخيب سرعتله اينسانلارين ياشاييشينين هر بير ساحه سيني بورورويوب، گئنيش شكيلده هر قاعده ني دئيشديرير. نئچه ايل دي بو "توپلومسال شبكه لر" هر نه يي تاثير آلتينا آليب. بونلاري ايچينده ده داها گوجلوسو فيس بوك، تويتر باشدا اولاراق هاميني اؤزونه ساري چكيب.
من بوردا مساله يه اؤز باخيشيمدان توخونماق ايسته ييرم؛ منجه بو سايتلارين اولوملو اؤزلليك لرين دن كنار بير پارا اولومسوز تاثيرلري ده وار؛ بونلارين لاپ باشيندا اولان منفي تاثير  بودور: اينسانلارين بو مجازي سايتلارا دلي جه معتاد اولمالاري دير! هر نه يي بوشلاييب گئجه گوندوزلري نين چوخلو  واخت پاييني بو سايتلاردا صرف ائتمك! سيزجه بئله دئيلمي؟

ياديما گلن آزربايجانيميزين هميشه چتين قيش لاري اولاردي. اما بيلميرم ندن بو ايل قيشدان هئچ خبر چيخمادي. اوشاقليق چاغ لاريميزدا قار ياغاردي نه بويدا! بيلميرم يئره ياغان قارلارين بويو اوجا اولاردي يا دا بيز اوشاقلارين بويو آلچاق! هر نه ايدي اينديكي قيشلاردان داها چوخ قار ياغاردي. ائله بيل تانري بو ايل قيش دويمه سي نين باسماسين اوندوب! اما بير ياندان اورمو گؤلوموزون بو ايل ده سوسوز قالديغينا باخماييب او بيري ياندان زلزله زده وطنداشلاريميزين راحات بير قيش كئچيردييي لرينه گؤره بير آز دا سئوينمه لي ييق.

دونن يورد سايتين دان 20 دنه دن چوخ آلديغيم كيتاب گليب اليمه  چاتدي. بو سايتي چوخ سئويرم. سسين ائشيديب اما ياخيندان گؤرمه ديگيم سايين علي بي فرهاد جيناب لاري چوخ دوزگون شكيلده بو سايتي دولانديرير. سيز بو سايتا باش وروا بيلرسينيز و منيم بو دئديگيمي سينيابيلرسينيز. الي قولو وار اولسون. ياشاسين...