بير كوهنه دووارا تاخيلان ساعاتي تعمير ائتمه لي ايدي. ايش دورومو گوندن گونه آغيرلاشيردي. يالنيز قديم مشتري لر آرا سيرا دوكانا يول لاري دوشوردو. اما عادتاً بو ايش دن باشقا آيري بير ايشه باشيني قاتان دئيلدي. بو اونون آتا بابادان قالان صنعتي ايدي. تبريزه ايلك كؤكلو-عقربه لي ساعات لار گلن دن زامان بو صنعت اونلارين عائيله صنعت لري ساييليردي. بؤيوك آتاسي، اؤز آتاسي و ايندي ده اؤزو؛ بو سيرا داها قيريلماغا معروض قالميشدي. دونيا داها دئيشيلميشدي. ديجيتال دونيا هر ايشي-ساحه ني بوروموشدو. كولك كيمي اسيب بوتون صنعت لري ييخيب كئچميشدي. اما بو دوكان بير سينيق گمي كيمي آز قاليب پارچالانسادا بو فيرتينالي دنيز ايچره سينده آياق اوسته قالماقا چاليشيردي. بلكه ده باتماق دورموندايدي؛ اما گمي باتمادان ايشيني-صنعتيني باتيرتماق ايسته ميردي. اوشاقليق- گنجليك آن لاري، بوتون ياشاييشي، وار-يوخو بو دوكانا باغلي ايدي.

اوشاقليق چاغ لاري آتاسي نين يانيندا ائله بو دوكاندا ساعات لارلا اويناماغا كئچه‌ردي. هر ساعاتا بير جان وئريب، هره سين بير آداما اوخشاداردي. بعضاً ساعاتلاري بير عائيله سانيب اويناماغي اوزاداردي. بالاجا قول ساعاتلاري اوشاق لار، ماسا اوستو ساعات لاري آنالار، بابالار و دووارا تاخيلان پاندوللو ساعاتلاري دا عائيله نين بؤيوك آتا آنالاري رولونو اوينارديلار. اوشاق لار هميشه كي كيمي قايداري پوزوب دوكاني باش لاري اوسته قويارديلار. هر نه يي بير بيرينه ووروب داغيدارديلار. سايلاري نين چوخ اولدوغونا گؤره هئچ واخت اونلاري بير يئره ييغماق اولمازدي. بو تاي اوتايا گيزله نرديلر. يازيق ماسا اوستو ساعاتلار دا آنا آتا كيمي بونلارين دالينجا قاچاراق هر دن ده ماسا اوستوندن دوشوب قول بوداغلاري داغيلاردي.

اما دووارا تاخيلان ساعات لار قوجامان بير آدام كيمي تكجه دورومو نظارت آلتينا آليب هردن پاندوللاري ساعات باشينا يئتيشينجه سسله نيب اؤيود وئررديلر. بو آنلار بوتون عائيله دايانيب سؤزه باخمالي ايديلار.

-سلام عمي! نئجه سن؟ بو بيزيم ساعاتا باخارسان؟ آتام ياديگاري دير. تازا صاندوقچادان تاپميشام. باخ گؤر تعمير ائده بيلرسن؟

آه! تازا مشتري!

 بو دالغين اوشاغليق آنلاريندان داها چيخمالي ايدي. بو گون داها ايكي ساعات تعمير ائتمه لي ايدي.